Շատերն իրենց օրն սկսում են մի բաժակ բուրավետ սուրճով, որն օգնում է թարմանալ, էնարգիա է հաղորդում և առույգացնում է։ «Healthline» ամսագրի տվյալներով՝ առավոտյան սուրճ խմելու սովորությունը շատ օգտակար է, քանի որ այս ըմպելիքն օգնում է բարելավել սրտամկանի աշխատանքը, սակայն կան որոշակի բաղադրիչներ, որոնք սուրճին ավելացնելը կօգնի էլ ավելի օգտակար դարձնել այս ըմպելիքը։
Մասնագետները ներկայացրել են հինգ բաղադրիչ, որոնք կօգնեն դարձնել սուրճն ավելի համեղ ու օգտակար։
Դարչին
Գիտնականների հետազոտությունները ցույց են տվել, որ այս համեմունքը հարուստ է հակաօքսիդանտներով, որոնք պաշտպանում են սրտամկանի ու գլխուղեղի բջիջներն օքսիդացնող սթրեսի կործանարար ազդեցությունից։ Ընդ որում՝ առավել օգտակար է ցեյլոնյան դարչինը։ Մասնագետների խոսքով՝ դարչինն ամրապնդում է իմունային համակարգն ու բարձրացնում դիմադրողականությունը, ուստի մի բաժակ սուրճին կես թեյի գդալ դարչին ավելացնելը կարող է շատ օգտակար լինել։
Կոճապղպեղ
Այս համեմունքն ըմպելիքին մի փոքր կծու համ կհաղորդի, սակայն կդարձնի այն շատ ավելի օգտակար։ Կոճապղպեղը հակաբորբոքային ազդեցություն է ունենում, կարգավորում է մարսողությունը, նվազեցնում է խոլեստերինի մակարդակն ու անգամ մեղմում է մկանային ցավը։ Առավել օգտակար ըմպելիք ստանալու համար խորհուրդ է տրվում սուրճին ավելացնել քերիչով մանրացրած կոճապղպեղի արմատ։
Քրքում
Քրքումի ակտիվ բաղադրիչը քրքումինն է, որն օժտված է հզոր հակարբորբոքային ազդեցությամբ, բարելավում է լյարդի աշխատանքն ու օգնում է բուժել ընկճախտը։ Քրքումին մի պտղունց պղպեղ ավելացնելու դեպքում օրգանիզմն այն շատ ավելի լավ կյուրացնի, ուստի սուճին խորհուրդ է տրվում ավելացնել այդ խառնուրդը։ Սկզբնական շրջանում կարելի է մի բաժակ սուրճին ավելացնել ¼ թեյի գդալ քրքում, իսկ հետագայում աստիճանաբար մեծացնել չափաբաժինը՝ հասցնելով մեկ թեյի գդալի։
Խաշխաշի սերմեր
Այս սերմերը պարունակում են մոտ 20 ամինաթթու և հարուստ են վիտամին С-ով։ Նման յուրահատուկ բաղադրության շնորհիվ խաշխաշի սերմերը բարելավում են վերարտադրողական համակարգի առողջական վիճակն ու պահպանում հորմոնների ճիշտ բալանսը։ Սննդաբանների խոսքով՝ օրական կարելի է օգտագործել 1-3 թեյի գդալ խաշխաշի սերմերի փոշի։
Կակաո
Կակաոն դասվում է ամենաօգտակար սննդամթերքի տեսակների շարքին։ Այս մթերքը նվազեցնում է զարկերակային բարձր ճնշումն ու հակադեպրեսանտային ազդեցություն է ունենում։ Բացի այդ, այն երկաթի ամենահարուստ բուսական աղբյուրն է, որը նաև պարունակում է մեծ քանակությամբ հակաօքսիդանտներ։ Առավել օգտակար է օրգանական հում կակաոյի գործածությունը, քանի որ դրանում գլխուղեղի աշխատանքը բարելավող ամինաթթուների պարունակությունը շատ ավելի բարձր է։