ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը քվեարկեց 7/3 տեղամասում (հասցե՝ Երևան, Բաշինջաղյան փող. 2-րդ նրբ., 4, թիվ 47 մանկապարտեզ): Նա ընտրատեղամաս էր եկել կնոջ՝ Բելլա Քոչարյանի հետ: Լրագրողների հետ զրույցում Ռոբերտ Քոչարյանը նշեց, որ այսօր քվեարկել է հանուն արժանապատիվ խաղաղության ու տնտեսական վերելքի:
Երկրորդ նախագահը նաև նշեց, որ Կարեն Կարապետյանն իրենց հետ է, բայց թե ինչպիսի համագործակցություն կլինի, դեռ չեն խոսել:
Ռոբերտ Քոչարյանն անդրադարձավ նաև Արմեն Չարչյանի ձերբակալությանը, ընդգծելով, որ ձերբակալությունն աբսուրդի ժանրից էր, և որևէ հիմք չկար՝ Արմեն Չարչյանին ձերբակալելու:
Անդրադառնալով հակաքարոզչական թռուցիկներին՝ Ռոբերտ Քոչարյանը նշեց, որ դա օրենքի կոպիտ խախտում է, քաղաքում տեղադրված են հազարավոր տեսախցիկներ, ու արդեն կան կադրեր, ու այն փաստը, որ դեռևս չի բացահայտվել՝ ով է արել, ուղղակի մեծ կասկած է առաջացնում, որ դա արվում է իշխանության կողմից կամ իրենց ուղղորդմամբ:
«Եթե մոտակա մեկ-երկու ժամվա ընթացքում ոստիկանությունը չհայտնաբերի հանցագործներին, մենք կհամարենք և կհայտարարենք, որ դա արվում է իշխանության կողմից»,-ասաց նախագահը:
Նշենք, որ այսօր ժամ 08։00-ից մեկնարկել է արտահերթ խորհրդարանական ընտրությունների քվեարկությունը:
Հիշեցնենք, որ ընտրողների ցուցակներում ընդգրկված է 2 միլիոն 593 572 ընտրող, արտահերթ ընտրություններին մասնակցում են 21 կուսակցություն և չորս կուսակցությունների դաշինք, որտեղ ընդգրկված է 2510 թեկնածու:
2008 տեղամասային կենտրոն կգործի, որոնցից 12-ը քրեակատարողական հիմնարկներում են: Ընտրություններին առաքելություն կկատարեն 8 միջազգային և օտարերկրյա դիտորդական առաքելություն իրականացնող կազմակերպություններ՝ 833 միջազգային դիտորդներ: