Հաղորդավարուհի, դերասանուհի Ինգրիտ Կոկչյանը երեկ նշել է 36֊ամյակը։ Ըստ Ինգրիտի՝ սա կնոջ կյանքի ամենահետաքրքիր շրջանն է։ Նածիծաղելով ասաց, որ իր տարեդարձի մասին հեռախոսից է իմացել։ Օրվա գեղեցիկ մեկնարկի, որդու անսհաման ուշադրության ու տարիքի մասին Ինգրիտը խոսել է Tert.am Life֊ի հետ։
«Մայրս միշտ հպարտ հայտնում էր իր տարիքը և մեկ ժամ հաճոյախոսություններ լսում իր հասցեին։ Ես երբեք չեմ հասկացել այն կանանց, որոնք թաքցնում են իրենց իրական տարիքը։ Ես երբեք չեմ թաքցնում, թե քանի տարեկան եմ։ 36 տարեկան եմ, մոտենում եմ 40֊ին՝ սարսափելի է, բայց փաստ»,֊ծիծաղելով նշեց Ինգրիտը։
Դերասանուհու խոսքով՝ ներքուստ բոլորովին այլ տարիքում է․ «Ես մարդ եմ, որը հոգով երիտասարդ է արդեն 16 տարի։ Ինձ 20 տարեկանի նման եմ պահում, 20 տարեկանի նման եմ երջանկանում, զարմանում, ուրախանում, վազվզում, հիանում։ Սա շատ տարօրինակ ու յուրահատում բան է։ Չգիտեմ՝ դա լա՞վ է, թե՞ վատ։ Տարիքս ընդհանրապես չեմ զգում։ 20 տարեկան շատ ընկերներ ունեմ, որոնց հետ հավասար ընկալումներ ունենք։ Չեմ դադարել զարմանալ և հիանալ, ինչպես դա լինում է տարիքի հետ։ Մի ամբողջ իմաստության ճամպրուկ եմ հավաքել, որն ակտիվորեն կիրառում եմ։ Դրա հետ մեկտեղ երջանիկ եմ և ունեմ շատ վառ էմոցիաներ։ Ըստ էության՝ հոգուս աճը 20 տարեկանում կանգնել է»։
Հարցին, թե ինչպիսի տարիքում է հիմա ինքը, դերասանուհին փիլիսոփայորեն պատասխանեց․ «36֊ը կնոջ կյանքում ամենահետաքրքիր ընթացքներից մեկն է։ Ինչ֊որ աստիճանով վերջապես սկսել ես ճանաչել քեզ, հասկացել ես քո մարմինը, քո ցանկությունները։ Այս տարիքում դու մոտ ես նրան, որ կարողանաս քեզ թույլ տալ անել այն, ինչ ուզում ես, ոչ թե այն, ինչը պարտադրված ես։ Այն կարծրատիպերը, որոնք կյանքի ընթացքում հավաքել ես, կարող ես թողնել ու ապրել այնպես, ինչպես ուզում ես։ Այս տարիքում դու մոտավոր գիտես՝ ինչ ես ուզում, ճանաչում ես մարմնիդ ունակությունները։ Սա հոյակապ տարիք է։ Ինքնաճանաչողությունը, իհարկե, ողջ կյանքիս ընթացքում է ձգվելու, ես ամեն օր իմ մեջ նոր բան եմ բացահայտում, սակայն այս տարիքում ինչ֊որ չափով ճանաչել եմ ինձ և մոտավոր հասկացել եմ՝ ինչն է ինձ դուր գալիս։ Ես վայելելու եմ այս տարիքը, որովհետև ամեն ինչ շատ վառ եմ զգում։ Նախկինում ավելի շատ ուսումնասիրում էի, քան վերապրում, հիմա, իմանալով ինչ ես զգում, շատ ավելի հեշտ ես վայելում»։
Ինգրիտն ասաց, որ երբեք ցանկությունների ցանկ չի ունեցել, ապա կատակեց, որ «ցանկությունների ցանկ» ֆունկցիայից չի օգտվում անգամ, երբ օնլայն գնումներ է կատարում․ «Ցանկությունների ցանկ ասվածը երբեք չեմ ունեցել։ Հիմա ես ուզում եմ գնալ Բալի։ Բայց դա ցանկության ցանկում չէ, եթե խոսում ենք ավելի գլոբալ բաներից։ Իմ կյանքը շատ անսպասելի ու կտրուկ շրջադարձեր է ունենում։ Ես պետք է կենտրոնանամ ու ճիշտ արձագանք տամ այդ շրջադարձերին։ Նեղության մեջ չնեղվեմ, բարդության դեպքում ինձ չկորցնեմ։ Ես կենտրոնանում եմ ճիշտ արձագանքների վրա։ Օրինակ «Մերսեդես»֊ի վարորդը կենտրոնանաում է ճիշտ ճանապարհների վրա, նա ստրատեգ է, մշակում է կարճ ճանապարհը, ընտրում է հաճելի ու բարեկարգ տարբերակը։ Ես BMW քշող եմ, որը ձեռնոցները հագին 200 արագությամբ սլանում է։ Այս դեպքում պետք է կենտրոնանաս պահի, ոչ թե ստրատեգիայի վրա։ Ես երբեք մարտավարություն չեմ ունեցել՝ ինչ լինում է, ըստ պահի ճիշտ կողմնորոշվում եմ։ Փորձում եմ հնառավորինս վայելել կյանքը։ Ինձ թվում է՝ ամեն վայրկյանը կարող է վերջինը լինել ու այդ զգացողությամբ ես ամբողջ կյանքս եմ ապրում։ Փորձում եմ հնարավորինս ապրել պահը»։
Խոսելով ցանկալի տարեդարձի մասին՝ դերասանուհին ասաց․ «Տարեդարձս նշելու հետ կապված ոչ մի «ֆետիշ» չունեմ։ Կրկին ադապտացվում եմ տվյալ պահին։ Առհասարակ մոռացել էի, որ տարեդարձս է։ Ծնունդիս մասին հիշեցրեց հեռախոսս։ Քանի որ ես միշտ բոլորի տարեդարձները մոռանում եմ, նորմալ է, որ մի օր էլ իմն էի մոռանալու։ Այդ օրն էլ եկավ»։
Օրը դերասանուհու համար առանց անակնկալների չի անցել: «Նախկին ամուսինս ծաղկեփունջ նվիրեց և ամեն ինչ իր տեղն ընկավ։ Աստրին տորթն իր վրա լղոզեց ու այդպես շնորհավորեց տարեդարձս։ Տղաս երեք օր է՝ հայրիկի տանն ինքնամեկուսացել էր։ Անրին շատ ռոմանտիկ է և շատ ուշադիր իմ հանդեպ»,- ասաց նա ու հավելեց, որ Անրին իրեն շնորհավորել է ծաղիկներով և ոճային ակնոց նվիրելով։
«Ես իրեն այնպես եմ դաստիարակել, որ կանանց հանդեպ այդպիսին պետք է լինել։ Մի օր իր կողքի կինն ինձ շնորհակալ կլինի, որ ես այդքան ուշադիր տղա եմ դաստիարակել։ Ձեռք է մեկնում, ծաղիկներ նվիրում, միշտ զանգահարում, ասում է, որ սիրում է, ամեն ինչ լավ է լինելու։ Երբ ես վատ շրջան եմ ունենում, ինքն ամուր ուսի պես է ինձ համար։ Ես նրանով հիանում եմ։ Դա աչքերը լցնելու չափ սենտիմենտալ պահ է։ Մի քանի տարի առաջ նա ինձ կարմիր շրթներկ էր նվիրել իր մատիտի հետ։ Ես ուղղակի ցանկություն էի հայտնել, ու նա գնել էր, ինքն էր ամեն ինչ ընտրել։ Բոլորը զարմանում էին, թե ինչպես այդ տարիքի տղան կարող է կարմիր շրթներկ գնել մայրիկի համար, բայց ես իրեն հենց այդպիսին եմ դաստիարակել։ Նա պետք է կնոջը ճանաչող, ուսումնասիրող ու բարձրացնող լինի»,֊ասաց Ինգրիտը։
