Զրույցում երգիչը նշեց, որ տեսահոլովակի պրեմիերան հարսանիքի օրն անելն իր մտահաղացումն է եղել.
«Երգի եւ գործիքավորման հեղինակը Մարտին Միրզոյանն է, խոսքերը գրել է Գրիգոր Կյոկչյանը: Նրանց երաժշտական ճաշակն ինձ շատ հոգեհարազատ է, դրա համար էլ նախընտրեցի հենց նրանց հետ աշխատել»,-անդրադառնալով երգի ստեղծմանը` հավելեց նա:
«Գնալով» տեսահոլովակի ռեժիսորը Կարեն Ամյանն է, հերոսուհին երգչի կինն է` Աննան: Նա նկարահանվել է նաեւ Վլադիմիրի «Իմս» տեսահոլովակում: Խոսելով համատեղ նկարահանումների մասին` երգիչը նշեց, որ սիրելիի հետ հեշտ է աշխատում.
«Նկարահանումները շատ հետաքրքիր են անցնում: Հենց իմ որոշումն է եղել, որ Աննան կրկին լինի տեսահոլովակի հերոսուհու դերում»:
Հարցին` հնարավո՞ր է կինն այսուհետ լինի իր բոլոր տեսահոլովակների մշտական հերոսուհին` Վլադիմիրը ժպիտով պատասխանեց.
«Կարծում եմ` ոչ: Հնարավոր չէ միշտ այդպես անել»:
Մեզ հետ զրույցներից մեկում Վլադիմիրը նշել էր, որ կինը եւս երգում է, եւ չէր բացառել, որ, գուցե, հետագայում հանդես գան զուգերգով. հետաքրքրվեցինք` արդյոք աշխատո՞ւմ են այդ ուղղությամբ.
«Անկեղծ ասած` դեռ չենք մտածել այդ մասին, բայց, այո, միգուցե մի օր լինի նման բան»,-պատասխանեց նա:
Երգիչը չի բավարարվում նոր տեսահոլովակով, նա շարունակում է աշխատել նոր երգերի շուրջ, եւ ինչպես նշեց` «Եթե ամեն ինչ ստացվի այնպես, ինչպես ծրագրում ենք, փետրվարի 14-ին նոր երգի պրեմիերա կունենամ»: