Դերասան Սիսիան Սեփանյանը, ով այս շրջանում զբաղվածություն ունի «Շիրազի Վարդը» հեռուստասերիալում, շուտով կներկայացնի իր գրած երաժշտություններից կազմված ալբոմ: Tert.am Life-ը նրա հետ զրուցել է նոր մասնագիտության, ուսանողական տարիների սխալների, սիրելի գրքերի, ֆիլմերի և անձնական կյանքի մասին:
Երկրորդ մասնագիտությունը
Ես երաժշտություն եմ գրում, ինչն արդեն դարձել է իմ երկրորդ մասնագիտությունը: Մասնագիտական կրթություն չունեմ, բայց գրում եմ ջազ, հիփ-հոփ ոճերի մեջ: Երգիչների համար պատվերով գործ չեմ անում: Չեմ բացառում, որ մոտ ժամանակներս կլինեն համագործակցություններ հայ կամ արտասահմանցի երգիչների հետ: Շուտով կունենամ ալբոմ, որը հասանելի կլինի օնլայն հարթակներում: Թիրախային լսարանս միայն հայերը չեն, այլ ամբողջ աշխարհը:
Դասեր եմ քաղել
Ուսանողական տարիներին արված սխալներն ու հաջողությունները մեծ դեր են խաղում մասնագիտության և կարիերայի մեջ: Դա այն ժամանակաշրջանն է, երբ դու սխալներ գործելու իրավունք ու ժամանակ ունես: Չպետք է վախենաս սխալվելուց, քանի որ հենց այդ ժամանակ ես փորձ ձեռք բերում: Ես շատ չեմ սխալվել, բայց այդ քիչ սխալներիցս ոչ թե հուսահատվել եմ, այլ դասեր քաղել: Եթե ուսանողական տարիքում չանես մասնագիտական այդ սխալները, հետո կանես: Ամեն դերասան ունի իր ուղին, որը կարող է և՛ բարդ, և՛ հեշտ լինել: Իմ ամենամեծ դժվարությունը խոսքն է եղել, քանի որ Թեհրանում եմ ապրել: Հայաստան գալուց հետո բարդ էր խոսքս շտկել ու փոխել, բայց ստացվեց:
Աշխատասիրությունն ամենակարևորն է
Դերասանի համար կարևոր է ունենալ ձայն, արտաքին տվյալներ, խարիզմա, բայց այդ ամենը դեռ չի նշանակում, որ լավ դերասան ես: Բացի այս ամենը պետք է տեխնիկա, որին տիրապետել սկսում ես ուսանողական տարիներին` աշխատասիրությամբ: Եթե տաղանդավոր ես, բայց աշխատասեր չես, հիմք չես ունենա: Լավ է, որ դերասանը ունենա տեսք, ձայն, ճաշակ, բայց աշխատասիրությունն ամենակարևոր ասպեկտներից է:
Կարող եմ Վռոնսկուն մարմնավորել
Իմ կուրսղեկը միշտ ասում էր, որ կարող եմ խաղալ «Աննա Կարենինա» վեպից երիտասարդ սպա Վռոնսկուն: Անկեղծ ասած, ինքս էլ ցանկություն եմ ունեցել մարմնավորել նրան, որպես դերասան, այդ կերպարում ինձ լավագույնս դրսևորելու բոլոր հնարավորություններն ունեմ:
Սխալ կարծրատիպ է
Չկա ինչ-որ գրող, ով իմ մասնագիտական մտածողության ձևավորման մեջ մեծ դեր է խաղացել: Սխալ կարծրատիպ կա, թե դերասանը պետք է ինչ-ինչ գրողների ստեղծագործություններ կարդա: Ցանկալի է, որ դասական գրականություն կարդաս, ինչն ուսանողական տարիներին դերասանն անում է: Իսկ Ստանիսլավսկու, Չեխովի ստեղծագործությունները, որոնք կարդում ենք, ինքս գիրք չեմ համարում: Դրանք մեխանիզմներ են, որոնցով սովորում ենք: Եթե խոսեմ ինձ առավել տպավորած գրքից, ապա Մարկեսի «100 տարվա մենություն» գիրքը մինչև օրս իմ կարդացած ամենատպավորիչ գիրքն է եղել:
Խորհուրդ եմ տալիս..
Հենց այս պահին դիտում եմ գերմանական արտադրության «Մթություն» կոչվող սերիալը, որից ցնցված եմ, բոլորին խորհուրդ եմ տալիս դիտել, եթե ազատ ժամանակ ունենան: Ֆիլմեր անդադար դիտում եմ, վերջինը, որից տպավորվել եմ, եղել է «Վիվարիում» ֆիլմը: Մարտաֆիլմեր ավելի քիչ եմ դիտում, բայց, առհասարակ. սահմանափակումներ չեմ դնում իմ առջև, դիտում եմ ցանկացած ժանրի ֆիլմ, սերիալ:
Անձնականի մասին
Սիրտս ազատ է: Եթե այս պահին իմանայի, թե ինչը կարող է գրավել ինձ դիմացինի մեջ, կամուսնանայի այդ աղջկա հետ: Ինձ կարող է վանել, օրինակ, եթե աղջիկն անճաշակ լինի, բայց վանող հատկանիշներից շատ խոսել չեմ ուզում, որպեսզի երբ այդ աղջիկը հայտնվի, չփորձի արհեստականորեն չանել այն, ինչն ինձ դուրս չի գալիս: