Արյան ճիշտ շրջանառությունն ամբողջ օրգանիզմի նորմալ գոյատևման ու գործունեության գլխավոր նախապայմաններից մեկն է, սակայն շատերն, այնուամենայնիվ, չեն նկատում այս գործառույթի խանգարումն ու գլխի չեն ընկնում դրա վտանգավոր հետևանքների մասին: Միևնույն ժամանակ մասնագետները նախազգուշացնում են, որ արյան շրջանառության խանգարումներ կարող են ի հայտ գալ ցանկացած տարիքում՝ դառնալով գլխուղեղի, սրտամկանի, երիկամների, լյարդի և կենսական նշանակություն ունեցող այլ օրգանների աշխատանքի վատթարացման պատճառ:
Նման խնդիրներից խուսափելու համար փորձագետները հորդորում են միշտ շատ զգոն լինել՝ խանգարումները ժամանակին հայտնաբերելու և դրանց դեմ միջոցներ ձեռնարկելու համար, ուստի ձեր ուշադրությանն ենք ներկայացնում ութ ախտանշան, որոնք կարող են պայմանավորված լինել արյան շրջանառության խանգարմամբ:
Վերջույթների թմրածություն ու ծակծկոց
Այս ախտանշանները ոչ միշտ են պայմանավորված լինում արյան շրջանառության խանգարմամբ, սակայն այնուամենայնիվ դրանք ոչ մի դեպքում չի կարելի անուշադրության մատնել: Բանն այն է, որ նման զգացողություններն ի հայտ են գալիս բավական վտանգավոր խնդիրների հետևանքով, որոնց շարքին են դասվում թրոմբների առաջացումն ու երակների հիվանդությունները:
Քայլելիս ոտքերում նկատվող տհաճ զգացողություններ
Եթե քայլելիս ոտքերում ի հայտ է գալիս ձգվածության տհաճ զգացողություն, ցավ ու այրոց, որը մեղմվում է կանգնելու դեպքում, ապա հարկավոր է դիմել սրտաբանին: Երբեմն այս ախտանշանները հուշում են սրտանոթային հիվանդությունների մասին, որոնք պայմանավորված են լինում աթերոսկլերոզով կամ անոթների պրոգրեսիվ կալցիումապատմամբ:
Կոճերի այտուցվածություն
Սովորաբար ոտքերի այտուցներն անվնաս են լինում և անցնում են առանց որևէ միջամտության 24 ժամվա ընթացքում, սակայն եթե խնդիրը կրկնվում է բավական հաճախ կամ պահպանվում է երկար ժամանակ, ապա հարկավոր է անպայման խորհորդակցել բժշկի հետ: Եթե ոտքերն այտուցվում են հանկարծակի, այտուցն ուղեկցվում ցանով ու քորով, ինչպես նաև նկատվում է ոտքերի մաշկի ջերմաստիճանի բարձրացում կամ ցավ, ապա հարկավոր է անհապաղ դիմել բժշկին, քանի որ խնդիրը կարող է պայմանավորված լինել արյան շրջանառության լուրջ խանգարումով և անգամ թրոմբի առկայությամբ:
Հոգնածություն
Արյան վատ շրջանառության դեպքում հյուսվածքներն ու օրգանները չեն ստանում անհրաժեշտ քանակությամբ սննդարար նյութեր ու թթվածին, ինչի հանգեցնում է ընդհանուր հոգնածության զգացողության, մկանային թուլության և անգամ ցավոտ զգացողությունների առաջացման:
Մաշկի երանգի փոփոխություն
Արյան շրջանառության վատթարացման մասին հուշող ևս մի ախտանշան կարող է լինել մաշկի գունատությունը, դեղնավուն կամ կապտավուն երանգը:
Սառը ձեռքեր ու ոտքեր
Ցրտի նկատմամբ գերզգայունությունը, հաճախ մրսելը, ինչպես նաև մշտապես սառը վերջույթները անգամ բարձր ջերմաստիճանի պայմաններում, նույնպես կարող են հուշել արյան վատ շրջանառության մասին:
Մոռացկոտություն
Արյան թույլ հոսքը բացասաբար է անդրադառնում նաև կոգնիտիվ գործառույթների վրա, ինչը կապված է գլխուղեղի վատ սնուցման ու սննդարար նյութերի և թթվածնի պակասի հետ: Ի վերջո մարդու մոտ ի հայտ են գալիս կենտրոնացման ու ընկալման հետ կապված խնդիրներ, մոռացկոտություն և այլն:
Եղունգների ու մազերի հետ կապված խնդիրներ
Արյան շրջանառության վատթարացման ֆոնին կարող են ի հայտ գալ այնպիսի խնդիրներ, ինչպիսին են մազաթափությունը, մազերի վատ աճը, թուլացումը, եղունգների փխրունությունը և այլն:
Հազվադեպ միզարձակություն
Արյան շրջանառության վատթարացման դեպքում երիկամներին մատակարարվող արյան ծավալը նվազում է, ինչի հետևանքով կարող են նկատվել փոփոխություններ միազազատական համակարգի աշխատանքում: Այս դեպքում մարդն ավելի հազվադեպ է միզում, մինչդեռ օգտագործվող ջրի քանակությունը չի նվազեցնում: